काठमाडौं । नेकपा ( एकीकृतसमाजवादी ) का अध्यक्ष माधवकुमार नेपालले गठबन्धन स्वाभाविक गतिका साथ अघि बढ्ने विश्वास व्यक्त गर्नुभएको छ ।
नवनिर्वाचित राष्ट्रपति रामचन्द्र पौडेललाई बधाई दिन सङ्घीय संसद् भवन पुग्नुभएका नेपालले सञ्चारकर्मीसँग प्रतिक्रिया दिँदै गठबन्धनको सरकार बनिसकेपछि स्वाभाविकरूपमा राष्ट्र र जनताप्रति गम्भीर जिम्मेवारी हुने उल्लेख गर्नुभयो ।
“भागबन्डामा अल्मलिने भन्दा पनि देश र जनताको निम्ति के गर्ने भन्ने कुरा चिन्ताको विषय हुन्छ”, उहाँले भन्नुभयो, “कुनै पनि समस्याको वैज्ञानिक समाधान खोज्नुपर्छ, सहकार्यको निम्ति पनि औचित्यपूर्ण ढङ्गबाट पुष्टि गर्ने किसिमबाट अगाडि बढ्नुपर्छ, त्यसो भयो भने सबै समस्याको समाधान हुन्छ ।”
नेता नेपालले राष्ट्रपतिको मतपरिणामलाई अत्यन्तै सकारात्मक र उत्साहवर्द्धक रूपमा लिएको बताउनुभयो । उहाँले भन्नुभयो, “हामीले जस्तो प्रकारको गठबन्धनका घटकहरूबीच सहमति गरेका थियौँ तद अनुरूपनै मत परिणाम प्राप्त भएको छ ।”
अध्यक्ष नेपालले राष्ट्रपति राष्ट्रको अभिभावक भएकाले राष्ट्रलाई सर्वोपरि हितमा राखेर काम गर्नुपर्ने उल्लेख गर्नुभयो । राष्ट्रपतिले संविधानले दिएको दायराभित्र बसेर आफ्नो जिम्मेवारी पूरा गर्दै आजसम्मको सङ्घर्ष र बलिदानीबाट प्राप्त उपलब्धिहरू संविधान, सङ्घीय लोकतान्त्रिक गणतन्त्र, समावेशिता लगायतका उपलब्धिको रक्षा गर्ने काममा जुट्नुपर्ने उहाँको भनाइ थियो ।
नेता नेपालले सरकार सञ्चालनका सन्दर्भमा पनि राष्ट्रको हितलाई सर्वोपरि राख्दै संविधानको मर्यादाको रक्षा र गणतन्त्रलाई जोगाउनका लागि समर्पित हुने विश्वास व्यक्त गर्नुभयो । उहाँले सङ्घीयतालाई देशअनुकूल सशक्त र प्रभावकारीरूपमा अघि बढाउँदै जनताको विकास र समृद्धिको चाहनालाई पूरा गर्न महत्त्व दिएर अघि बढ्नुपर्नेमा जोड दिनुभयो ।
-1732011400.jpeg)
-1731919476.jpg)