काठमाडौ । पुष्पलाल राष्ट्रिय पुरस्कार २०७९ बाट ३ जना स्रष्टा सम्मानित हुनु भएको छ । नेपाल सरकार संस्कृति पर्यटन तथा नागरिक उड्डयन मन्त्रालय सिंहदरबारले आयोजना गरेको कार्यक्रममा सोमबार प्रधानमन्त्रीको सरकारी निवास बालुवाटारमा आयोजित पुष्पलाल राष्ट्रिय पुरस्कार समर्पण समारोहमा प्रधानमन्त्री पुष्पकमल दाहाल प्रचण्डले राजनीति साहित्य संस्कृति र विज्ञानको क्षेत्रमा उल्लेख्य योगदान गरेका ३ जना स्रष्टालाई सम्मान गरिएको हो ।
पुष्पलाल राष्ट्रिय पुरस्कार २०७९ बाट पुरस्कृत हुनेहरूमा डा. बालचन्द्र मिश्र ,कमलप्रसाद कोइराला र गोपालप्रसाद थपलिया रहनु भएको छ ।
उहाँहरूलाई कार्यक्रमका प्रमुख अतिथि तथा प्रधानमन्त्री दाहाल सहित नेकपा एकीकृत समाजवादीका अध्यक्ष तथा पुष्पलाल स्मृति प्रतिष्ठानका अध्यक्ष माधवकुमार नेपाल र संस्कृति पर्यटन तथा नागरिक उड्डयन मन्त्री सुदन किराँतीले सम्मान सहित नगद पुरस्कार दिएर सम्मान गर्नुभएको हो ।
राजनीतिक सैद्धान्तिक विषयगत क्षेत्रमा कमलप्रसाद कोइराला, इतिहास विषयगत क्षेत्रमा डा.बालचन्द्र मिश्र र साहित्य, संस्कृति र विज्ञान विषयगत क्षेत्रमा गोपालप्रसाद थपलिया पुरस्कृत हुनु भएको हो ।
पुरस्कृत कोईराला विसं २००३ को मिलहरुको हड्ताल एवं मजदुरको जुलुसमा आठ वर्षको उमेरमा रमिते बनेर सहभागी हुनु भएका हुन् । २०१२ सालमा नेपाल कम्युनिष्ट पार्टीको सदस्य, २०१९ मा नेकपाको केन्द्रीय सदस्य, २०४७ मा नेकपा (एमाले)को केन्द्रीय सदस्य, २०५१ को निर्वाचनमा मोरङ क्षेत्र नं ५ बाट निर्वाचित सांसद तथा २०६४ सालमा दक्षिण कोरियाका लागि नेपाली प्रथम आवासीय राजदूत हुनु भयो ।
यस्तै विसं २०२२ मा ज्याला बढाउ अभियानबाट शोषण, उत्पीडन विरोधी आन्दोलनमा होमिनु भएका थपलिया २०२६ सालमा नेपाल कम्युनिष्ट पार्टीको सदस्य बन्नु भएको हो ।
यसै गरी दक्षिण एसियाको कम्युनिष्ट आन्दोलनमा विद्यावारिधि गर्नुभएका डा. मिश्र नेपाल विद्यावारिधि एसोसिएसनका अध्यक्ष, नवप्रवर्तन अनुसन्धान तथा शिक्षा प्रतिष्ठानका कार्यकारी अध्यक्ष समेत हुनु हुन्छ ।
सरकारले राजनीति, इतिहास र साहित्य, संस्कृति एवं विज्ञान विषयगत क्षेत्रमा खोज, अनुसन्धान गरी मुलुकको विकास, समृद्धि र सम्वद्र्धनमा विशिष्ट योगदान पु¥याउने व्यक्तित्वलाई सो पुरस्कार प्रदान गर्दै आएको छ । यसअघि सो पुरस्कारबाट डा. बेदुराम भुसाल, प्रा. डा. सुरेन्द्र केसी, शान्ता चौधरी, हिरण्यलाल श्रेष्ठ, मोदनाथ प्रश्रित, डा. जगमान गुरुङ, घनेन्द्र बस्नेत, डा. ढाकाराम सापकोटा, जगन्नाथ आचार्य, मोहनचन्द्र अधिकारी, प्रा कृष्णप्रसाद पोखरेल, डा. माधवराज पन्थी, डा. राजेन्द्र विमललगायत सम्मानित भइसकेका छन् ।
सरकारले आर्थिक वर्ष २०६८ ६९ को बजेट वक्तव्यमा सो पुरस्कार प्रदान गर्ने व्यवस्था गरेको थियो । यो पुरस्कार हरेक वर्ष नेपालको राजनीतिक आन्दोलन तथा राजनीतिकरसैद्धान्तिक, नेपाली समाजको इतिहास र साहित्य तथा संस्कृति गरी तीन क्षेत्रमा खोज, अनुसन्धान र लेखनकार्यमार्फत नेपाली समाजको प्रगतिशील परिवर्तनका निम्ति गरिएको महत्वपूर्ण योगदानलाई कदर गर्दै ती स्रष्टालाई सम्मान गर्दै आएको छ ।
